Urdu poetry with local Maal

 ko_ii ai "Shakeel" dekhe ye junooN nahiiN to kyaa hai
ke usii ke ho gaye ham jo na ho sakaa hamaaraa

[Shakeel Badayuni]

 un ko aataa hai pyaar par Gussaa
ham ko Gusse pe pyaar aataa hai

[Ameer Minai]

 jazb-e-ishq salaamat hai to inshaa_allaah
kachche dhaage meN baNdhe aayenge sarakaar chale

[Daag Dehlvi]

 

 hazaaroN saal nargis apanii benoorii pe rotii hai
baRii mushkil se hotaa hai chaman meN deedaawar paidaa

[Iqbal]

 tar_daamanii pe shaikh hamaarii na jaa_iyo
daaman nichoR deN to farishte wazoo kareN

[Khwaja Mir Dard]

 

 wo kaun haiN jinheN taubaa kii mil ga_ii fursat
hameN gunaah bhii karane ko zindagii kam hai

[Anand Narain "Mullah"]

 chalaa jaataa hooN haNsataa khelataa mauj-e-hawaadis se
agar aasaaniyaaN ho zindagii dushwaar ho jaaye

[Asghar Gondvi]

 wo aaye haiN pashemaaN laash par ab
tujhe ai zindagii laa_ooN kahaaN se
[Momin]

 ham Khudaa ke kabhii qaayil hii na the
un ko dekhaa to Khudaa yaad aayaa
[Meer Taqi "Meer"]

 bahut shor sunate the pahaloo meN dil kaa
jo cheeraa to ik qataraa-e-KhooN na nikalaa
[Haider Ali "Aatish"]

 Khanjar chale kisii pe taRapate haiN ham "Ameer"
saare jahaaN kaa dard hamaare jigar meN hai
[Ameer Minai]

Khabar sun kar mere marane kii wo bole raqeeboN se
Khudaa baKhshe bahut sii KhoobiyaaN thii marane waale meN
[Daag Dehlvi]

 

 sitaaroN se aage jahaaN aur bhii haiN
abhii ishq ke imtihaaN aur bhii haiN
[Iqbal]

 zamaanaa baRe shauq se sun rahaa thaa
hamiiN so gaye daastaaN kahate kahate
[Saqib Lucknawi]

ham tum mile na the to judaa_ii kaa thaa malaal
ab ye malaal hai ki tamannaa nikal ga_ii
[Jaleel Manikpuri]

 

 janaazaa rok kar meraa wo is andaaz se bole
galii ham ne kahii thii tum to duniyaa chhoR jaate ho
[Safi Lucknawi]

 waaye naadaanii ki waqt-e-marg ye saabit huaa
Khwaab thaa jo kuchh ki dekhaa jo sunaa afsaanaa thaa
[Khwaja Mir Dard]

zaahid sharaab peene de masjid meN baiTh kar
yaa wo jagah bataa de jahaaN par Khudaa na ho
[Daag Dehlvi]

 

 zindagii zindaadilii kaa naam hai
murdaa dil kyaa Khaak jiyaa karate haiN
[Nasikh]

 dushmanoN ke saath mere dost bhii aazaad haiN
dekhanaa hai pheNkataa hai mujh pe pahalaa teer kaun
[Parveen Shakir]

jeeye jaane kii tohamat kis se uThatii kis tarah uThatii
tere Gam ne bachaa_ii zindagii kii aabaroo barasoN
[Fani Badayuni]

 

wo baRaa raheem-o-kareem hai mujhe ye sifat bhii ataa kare
tujhe bhoolane kii duaa karooN to duaa meN merii asar na ho
[Bashir Badr]

 

ham bhii dariyaa haiN hameN apanaa hunar maaloom hai
jis taraf bhii chal paRenge raastaa ho jaayegaa [Bashir Badr]